Bir çox qızlar tez-tez bu cür suallarla qarşılaşırlar: Aybaşını necə hesablamalı? Menstrual dövrü necə hesablamalı? Bu suallara cavab tapmaq üçün aybaşı təqvimi aparmaq lazımdır.
Niyə aybaşı təqvimi aparmaq vacibdir?
Çünki menstrual dövr qadın sağlamlığının göstəricisidir. Belə bir təqvimlə sən hər zaman əvvəlki aybaşının nə vaxt olduğunu və növbəti aybaşını nə vaxt gözləməli olduğunu dəqiq biləcəksən, gecikmələri və dövrün dəyişməsini görəcəksən.
Bundan əlavə, menstrual təqvim ginekoloq üçün, hətta profilaktik müayinələrdə belə, yaxşı bir məlumat mənbəyidir ki, bu müayinələr heç olmasa ildə bir dəfə aparılmalıdır.
Aybaşı təqvimini necə düzgün aparmaq olar?
Son aybaşının başlanğıc tarixini, onun müddətini və dövrün orta uzunluğunu düzgün qeyd etmək lazımdır.
Yadda saxla:
- Aybaşının ilk günü menstrual dövrün ilk günü sayılır.
- Orta dövr 28 gün davam edir, lakin böyüklərdə 21-35 gün, yeniyetmələrdə isə 21-45 gün ola bilər.
- Aybaşı orta hesabla 3-5 gün davam edir, lakin 2-7 gün davam edə bilər.
Siklini izləmək üçün xüsusi bir smartfon tətbiqindən istifadə etmək rahatdır. Bu tətbiq dövrün uzunluğundan əlavə digər vacib göstəriciləri də nəzərə alır və kömək edir:
- Səyahətləri və dənizdə gözlənilən istirahəti əvvəlcədən planlaşdırmağa;
- Ovulyasiyanı proqnozlaşdırmağa, hamiləliyi planlaşdırmağa, kontraseptiv qəbulunu nəzarətdə saxlamağa;
- Prokladka Prokladka və ya tampon tampon almağı vaxtında xatırlamağa.
Bəs, hansı tətbiq aybaşını izləmək üçün ən yaxşıdır? Siklini asanlıqla izləməyə kömək edəcək top-5 tətbiqi seçdik.
Menstruasiyanı izləmək üçün 5 ən yaxşı tətbiq
Flo
Həm pulsuz, həm də ödənişli versiyası mövcuddur. Qadın təqvimi, hamiləlik planlama rejimi var, sağlamlıq və qidalanmanı izləmək mümkündür. Qadın sağlamlığı haqqında faydalı məqalələr mövcuddur. Başqalarının baxışlarından qorunmaq üçün kod qorunması quraşdırıla bilər.
Clue
Sadə və neytral interfeys. Gələcək aybaşını üç dövr qabaqcadan proqnozlaşdırır, hamiləlik ehtimalını hesablayır, dövr pozuntusu barədə xəbərdarlıq edir, keçmiş dövrlərin məlumatlarını saxlayır və dəyişiklikləri izləmək üçün orta dəyərlər verir. Şəxsi məlumatlar mükəmməl qorunur.
Period Tracker
Siklin izlənməsi üçün sadə funksional planlayıcı. Bütün məlumatlar birbaşa təqvimə daxil edilə bilər, simptomlar və emosional vəziyyət qeyd edilə bilər, həmçinin qeyd əlavə etmək mümkündür.
Eve
Bütün proseslər ikonalar, stikerlər və emoji ilə illüstrasiya olunur, hətta bildirişlər də smayliklərlə gəlir. Standart funksiyalardan əlavə, Eve-də moda, fitnes, münasibətlər, seriallar kimi maraq qrupları olan daxili sosial şəbəkə var.
Frau
Dörd rejim təklif edir: hamilə qalmaq istəyənlər üçün; hamilə qalmaq istəməyənlər üçün; hamilə qadınlar və menopauza dövründə olan qadınlar üçün. Hər rejimdə müxtəlif funksiyalar var.
Nəzərə al ki, bütün tətbiqlər yalnız dövrünü proqnozlaşdırır və əgər hər hansı bir dəyişiklik və ya sapma fərq etsən, ginekoloqa müraciət edərək müayinə olunmaq daha yaxşıdır.
